കാണാതായ പെൺകുട്ടിയുടെ മൃതദേഹം കണ്ടെത്തി : കോളജിനെതിരെ പെൺകുട്ടിയുടെ പിതാവ്; ആരോപണം നിഷേധിച്ച് കോളജ്

ചേർപ്പുങ്കൽ: പരീക്ഷ എഴുതാൻ വന്ന ശേഷം കാണാതായ കാഞ്ഞിരപ്പള്ളി പൊടിമറ്റം പൂവത്തേട്ട് അഞ്ജു ഷാജി(20) മൃതദേഹം കണ്ടെത്തി. അഗ്നിശമന സേനയുടെ മുങ്ങൽ വിദഗ്ധരാണ് കോളജിന് മൂന്ന് കിലോമീറ്റർ അകലെ ചെക് ഡാമിന് സമീപത്തായി വെള്ളത്തിൽ പൊങ്ങിക്കിടക്കുന്ന നിലയിലാണ് മൃതദേഹം കണ്ടെത്തിയത്.  ശനിയാഴ്ച മുതലാണ് പെൺകുട്ടിയെ കാണാതായത്.

കാഞ്ഞിരപ്പള്ളി സെൻ്റ് ആൻ്റണീസ് പാരലൽ കോളജിലെ ബീകോം വിദ്യാർത്ഥിനിയായ അഞ്ജുവിന് ചേർപ്പുങ്കൽ ബിവിഎം ഹോളിക്രോസ് കോളജിലാണ് പരീക്ഷാകേന്ദ്രം ലഭിച്ചത്. ശനിയാഴ്ച നടന്ന സെമസ്റ്ററിലെ അവസാന പരീക്ഷയിൽ കോപ്പിയടിച്ചെന്നാരോപിച്ചു കോളജ് അധികൃതർ അഞ്ജുവിനെ ശാസിക്കുകയും ഇറക്കി വിടുകയും ചെയ്തതായി ആരോപണമുയർന്നിട്ടുണ്ട്. ഇതിനു പിന്നാലെയാണ് വിദ്യാർത്ഥിനിയെ കാണാതാകുകയായിരുന്നു.

എന്നാൽ അഞ്ജു പഠനത്തിൽ മികച്ച നിലവാരം പുലർത്തിയിരുന്നതായി പിതാവ് ഷാജി പറയുന്നു. കഴിഞ്ഞ സെമസ്റ്ററുകളിലെ പരീക്ഷകളിലെല്ലാം നല്ല മാർക്കുണ്ടായിരുന്നതായും ബന്ധുക്കൾ ചൂണ്ടിക്കാട്ടി. എന്നാൽ ഹാൾ ടിക്കറ്റിൽ പാഠഭാഗങ്ങൾ എഴുതി കൊണ്ടുവന്നു കോപ്പിയടിച്ചതിനാണ് വിദ്യാർത്ഥിനിയ്ക്കെതിരെ നടപടിയെടുത്തതെന്നു കോളജ് പ്രിൻസിപ്പൽ ഫാ ജോസഫ് ഞാറക്കാട്ട് അറിയിച്ചു. അധ്യാപകർ പറഞ്ഞതനുസരിച്ചാണ്  കോപ്പിയടിച്ചത് കണ്ടെത്തിയത്. കോപ്പിയടിച്ചതു സംബന്ധിച്ചു വിശദീകരണം എഴുതി നൽകാൻ ആവശ്യപ്പെട്ടു നിർദ്ദേശം നൽകിയെങ്കിലും പിന്നീട് കുട്ടിയെ കണ്ടില്ലെന്നും പ്രിൻസിപ്പൽ പറഞ്ഞു.

അതേസമയം കോളജ് അധികൃതരുടെ നടപടിക്കെതിരെ പെൺകുട്ടിയുടെ ബന്ധുക്കൾ രംഗത്തു വന്നിട്ടുണ്ട്. കോളജ് അധികൃതരുടെ നിലപാടാണ് കുട്ടിയുടെ മരണത്തിനിടയാക്കിയതെന്നു പിതാവ് ഷാജി ആരോപിച്ചു.

പരീക്ഷ എഴുതിയ മറ്റു കുട്ടികളും കോളജിൻ്റെ നടപടിക്കെതിരെ രംഗത്തുവന്നു. അധ്യാപകർ പറഞ്ഞിട്ടാണ് പ്രിൻസിപ്പൽ എത്തിയതെന്നും കുട്ടിയുടെ പക്കൽ നിന്നും ഹോൾ ടിക്കറ്റ് വാങ്ങിച്ചു വച്ചതായും ഇവർ ആരോപിച്ചിട്ടുണ്ട്.