പെൺകുട്ടിയുടെ മരണം: വീഴ്ചയില്ലെന്ന് കോളജ് അധികൃതർ

ചേർപ്പുങ്കൽ: പരീക്ഷയെഴുതാൻ എത്തിയ അഞ്ജു ഷാജി ആത്മഹത്യ ചെയ്ത സംഭവത്തിൽ കോളജിന് വീഴ്ച പറ്റിയിട്ടില്ലെന്നു ചേർപ്പുങ്കൽ ബി വി എം കോളജ് അധികൃതർ. അധ്യാപകർ നടത്തിയ പരിശോധനയിൽ പാഠഭാഗങ്ങൾ മുഴുവൻ ഹോൾ ടിക്കറ്റിനു പിന്നിൽ എഴുതിയ നിലയിൽ കണ്ടെത്തിയതായുള്ള രേഖകൾ അധികൃതർ പുറത്തുവിട്ടു. തുടർന്നു പ്രിൻസിപ്പലിനെ അറിയിച്ചു. പ്രിൻസിപ്പൽ നടത്തിയ പരിശോധനയെത്തുടർന്നു പരീക്ഷ എഴുതുന്നതിൽ നിന്നും കുട്ടിയെ വിലക്കിയതായും പറഞ്ഞു.

യൂണിവേഴ്സിറ്റി നിയമപ്രകാരം പരീക്ഷ ആരംഭിച്ചു കഴിഞ്ഞാൽ ഒരു മണിക്കൂറിനു ശേഷമേ ഹാളിനു പുറത്തിറങ്ങാൻ പാടുള്ളൂ. അതിനാൽ ഒരു മണിക്കൂർ കഴിഞ്ഞ്  വിശദീകരണം നൽകണമെന്ന്  കുട്ടിയോട് പറഞ്ഞിട്ടു പ്രിൻസിപ്പൽ മടങ്ങിയിരുന്നു. എന്നാൽ കുട്ടി എത്തിയില്ലെന്നും അധികൃതർ വിശദീകരിച്ചു.

കോപ്പി പകർത്തിയ ഹാൾ ടിക്കറ്റും പരീക്ഷാ ഹാളിലെ സി സി ടി വി ദൃശ്യങ്ങളും അധികൃതർ മാധ്യമങ്ങൾക്കു മുന്നിൽ പ്രദർശിപ്പിച്ചു.

ദൃശ്യങ്ങളിൽ കുട്ടിയുടെ അടുത്ത് അധ്യാപകൻ ചെല്ലുന്നതും പരിശോധിക്കുന്നതും ഹാൾ ടിക്കറ്റ് എടുക്കുന്നതും കാണാം. ഈ സമയം അഞ്ജു ഭാവവ്യത്യാസമൊന്നും ഇല്ലാതെ ഹാളിൽ പരീക്ഷ എഴുതാതെ ഇരിക്കുന്നതും മറ്റു കുട്ടികൾ ഭാവവ്യത്യാസമില്ലാതെ പരീക്ഷ എഴുതുന്നതും ദൃശ്യങ്ങളിൽ ഉണ്ട്. തുടർന്നു അഞ്ജു പുറത്തേയ്ക്കു പോകുന്നതും കാണാം. കോളജിൻ്റെ ഭാഗത്തു നിന്നും വീഴ്ചയുണ്ടായിട്ടില്ലെന്നും അധികൃതർ വിശദീകരിച്ചു.