പെട്രോൾ ഒഴിച്ചു കത്തിക്കാൻ ശ്രമിച്ച സംഭവം: പഞ്ചായത്ത് ഡെപ്യൂട്ടി ഡയറക്ടർ തെളിവെടുത്തു

പാലാ : പഞ്ചായത്ത് ജീവനക്കാരൻ സഹജീവനക്കാർക്കു മേൽ പെട്രോൾ ഒഴിച്ചു കത്തിക്കാൻ ശ്രമിച്ച സംഭവത്തിൽ പഞ്ചായത്ത് ഡെപ്യൂട്ടി ഡയറക്ടറുടെ നേതൃത്വത്തിൽ
കടനാട് പഞ്ചായത്ത് ഓഫീസ് സന്ദർശിച്ചു. വ്യാഴാഴ്ച രാവിലെ 11 മണിയോടെയാണ് പഞ്ചായത്ത് ഡെപ്യൂട്ടി ഡയറക്ടർ ബിനു ജോൺ, പെർഫോമൻസ് ഓഡിറ്റ് സൂപ്പർവൈസർ സി.ആർ. പ്രസാദ്, സൂപ്രണ്ട് ഓഫീസർ അനൂപ് മോഹനൻ എന്നിവരടങ്ങുന്ന സംഘമാണ് പഞ്ചായത്തിൽ എത്തിയത്. സംഭവം യാഥാർത്ഥ്യമാണെന്ന് ബോധ്യപ്പെട്ടതായി സംഘം അറിയിച്ചു. പഞ്ചായത്ത് പ്രസിഡൻ്റിനോടും ജീവനക്കാരോടും വിവരങ്ങൾ ചോദിച്ചറിഞ്ഞു. ആശുപത്രിയിൽ ചികിത്സയിൽ കഴിയുന്ന സെക്രട്ടറി മനോജ്, അസി.സെക്രട്ടറി ബിനോയി എന്നിവരെ ആശുപത്രിയിലെത്തി സംഘം വിവരങ്ങൾ ചോദിച്ചറിഞ്ഞു.

ആക്രമണ സംഭവം ബോധ്യപ്പെട്ട സാഹചര്യത്തിൽ വകുപ്പുതല നടപടിക്ക് ശുപാർശ ചെയ്യുമെന്നും, ടോലിയിൽ വീഴ്ച വരുത്തന്നത് ബോധ്യപ്പെട്ട വെന്നും ഈ വിഷയത്തിൽ സുനിൽകുമാറിൻ്റെ വിശദീകരണം കേൾക്കുമെന്ന് ബിനു ജോൺ അറിയിച്ചു. തുടർന്ന് പഞ്ചായത്ത് ഡയറക്ടർക്ക് റിപ്പോർട്ട് നൽകും.

ബുധനാഴ്ച്ച ഉച്ചകഴിഞ്ഞ് മൂന്ന് മണിയോടെയാണ് കടനാട് പഞ്ചായത്തിലെ യു ഡി ക്ലാർക്ക് ജീവനക്കാരൻ സുനിൽ കുമാർ ഓഫീസിനുള്ളിലും ജീവനക്കാരുടെ ദേഹത്തും പെട്രോൾ ഒഴിച്ച് തീകൊളുത്താൻ ശ്രമിച്ചത്. ഓഫീസിനകം പെട്രോൾ പടർന്നതോടെ ജീവനക്കാർ പുറത്തേക്ക് ഓടി രക്ഷപെട്ടിരുന്നു. സെക്രട്ടറി ഉൾപ്പെടെയുള്ള ജീവനക്കാർക്ക് മർദ്ദനമേൽക്കുകയും ചെയ്തിരുന്നു. സുനിൽ ഓഫീസിൽ സ്ഥിരമായി എത്താറില്ലെന്നും, പല തവണ മെമ്മോയും നൽകിയിരുന്നതായും പഞ്ചായത്ത് അധികൃതർ പറയുന്നു. ജോലിക്കു ഹാജരാകാത്ത ദിവസത്തെ ഒപ്പും വരുന്ന ദിവസം ഇടുന്ന പതിവ് ഇയാൾക്കുണ്ട്.   ജീവനക്കാരുടെ സമയോചിതമായ ഇടപെടലാണ്  ദുരന്തം ഒഴിവാക്കാൻ ഇടയായതെന്ന് പ്രസിഡൻ്റ് ജെയിസൺ പുത്തൻകണ്ടം പറഞ്ഞു.

അതേ സമയം സുനിലിനെതിരെ മേലുകാവ് പോലീസ് കേസെടുത്തു. ജീവനക്കാരെ ഭീഷണിപ്പെടുത്തി, ജോലിക്ക് തടസം വരുത്തി, മർദ്ദനം എന്നീ വകുപ്പുകളും ചേർത്താണ് കേസെടുത്തിരിക്കുന്നത്.