മുണ്ടുപാലത്തെ പോണാട് പാടശേഖരം അനധികൃതമായി നികത്തുന്നുവെന്ന് പരാതി; വെള്ളക്കെട്ട് രൂപപ്പെട്ട് ഗതാഗതം നിലച്ചു

പാലാ: പാലാ നഗരസഭ പരിധിയിൽ ഉൾപ്പെട്ട മുണ്ടുപാലം ഭാഗത്ത് അനധികൃത പാടം നികത്തൽ നടക്കുന്നതായി പരാതി. ഇവിടെയുള്ള പോണാട് പാടശേഖരമാണ് നികത്തുന്നതായി പരാതി ഉയർന്നിട്ടുള്ളത്. ഇതു സംബന്ധിച്ചു നാട്ടുകാർ ജില്ലാ കളക്ടർ അടക്കമുള്ളവർക്കു പരാതി നൽകിയിരുന്നെങ്കിലും ഉന്നതരുടെ ഒത്താശയോടെ പാടശേഖരം നികത്തുന്നുവെന്നാണ് ആക്ഷേപം. നാലിറേറെ ജെ സി ബികൾ ഒരേ സമയം പാടശേഖരം നികത്തുന്നതായും നാട്ടുകാർ പരാതിപ്പെട്ടു. പാടശേഖരം നികത്തി പുരയിടമാക്കുന്നതോടെ ഈ ഭാഗമാകെ വെള്ളക്കെട്ടിൽ നിറയുമെന്ന ആശങ്കയും നാട്ടുകാർക്കുണ്ട്. വില്ലേജ്, താലൂക്ക് അധികൃതരുടെ ഒത്താശ അനധികൃത പാടം നികത്തലിനുണ്ടെന്നും നാട്ടുകാർ ആരോപിക്കുന്നു. പാടം നികത്തൽ ആരംഭിച്ചതോടെ വെള്ളക്കെട്ട് ആയി ഗതാഗതം താറുമാറായ റോഡ് വരുംനാളുകളിലെ ദുരിതത്തിനു സാക്ഷ്യം ആണെന്നും നാട്ടുകാർ ചൂണ്ടിക്കാണിക്കുന്നു.