കോട്ടയം : രക്തദാനം മഹാദാനം... ഈ മഹത്തായ സന്ദേശം ജനങ്ങളില്‍ എത്തിക്കുന്നതിനായി കേരളാ സ്റ്റേറ്റ് എയ്ഡ്‌സ് കണ്‍ട്രോള്‍ സൊസൈറ്റി, ജില്ലാ ആരോഗ്യ വകുപ്പ്, നാഷണല്‍ ഹെല്‍ത്ത് മിഷന്‍, പാലാ ബ്ലഡ് ഫോറം എന്നിവയുടെ ആഭിമുഖ്യത്തില്‍ വിവിധ തലത്തിലുള്ള പ്രോഗ്രാമുകള്‍ കഴിഞ്ഞ കുറെ വര്‍ഷങ്ങളായി നടത്തി വരികയാണ്.
'ജൂണ്‍ 14 ലോക രക്തദായക ദിനം' കോവിഡ് 19 ന്റെ പ്രെത്യേക സാഹചര്യത്തിലും സര്‍ക്കാരിന്റെ നിര്‍ദ്ദേശങ്ങള്‍ പാലിച്ചുകൊണ്ട് നമ്മളുടെ ജില്ലയില്‍ ആചരിക്കുകയാണ്. ജൂണ്‍ 13 മുതല്‍ 15 വരെ വിവിധ സ്ഥലങ്ങളിലായി സന്നദ്ധ രക്തദാന ക്യാമ്പുകളും മികച്ച രക്തദാതാക്കളെ ആദരിക്കലും നടത്തും. 13 ന് കോട്ടയം കളക്ട്രേറ്റ്, ഏറ്റുമാനൂര്‍, 14ന് പാലാ, 15ന് കോട്ടയം മെഡിക്കല്‍ കോളേജ് എന്നിവടങ്ങളിലാണ് നടക്കുന്നത്. ശനിയാഴ്ച രാവിലെ 11.30 ന് കോട്ടയം കളക്ട്രേറ്റില്‍ രക്തദാന ദിനാചരണത്തിന്റെ ജില്ലാതല ഉദ്ഘാടനം ഭക്ഷ്യ-സിവില്‍ സപ്ലൈസ് വകുപ്പ് മന്ത്രി പി തിലോത്തമന്‍ നിര്‍വ്വഹിക്കും.
ഉച്ചകഴിഞ്ഞ് 1.30 ന് പാലാ ബി എഡ് കോളേജ് ഓഡിറ്റോറിയത്തില്‍ അവയവദാനത്തിനുശേഷവും രക്തദാനം തുടരുന്ന പാലാ രൂപതാ സഹായമെത്രാന്‍ മാര്‍ ജേക്കബ് മുരിക്കനെ മാണി സി കാപ്പന്‍ എംഎല്‍എ, ജില്ലാ മെഡിക്കല്‍ ഓഫീസര്‍ ഡോ.ജേക്കബ് വര്‍ഗീസ്, പാലാ ഡി വൈ എസ് പി ബൈജുകുമാര്‍ കെ, ജില്ലാ മാസ് മീഡിയാ ഓഫീസര്‍ ഡോമി ജോണ്‍ എന്നിവരുടെ സാന്നിദ്ധ്യത്തില്‍ മന്ത്രി പി. തിലോത്തമന്‍ ആദരിക്കും. അര്‍ച്ചനാ വുമന്‍സ് സെന്റര്‍ ഏറ്റുമാനൂര്‍, ആള്‍ കേരളാ കരാട്ടെ അസ്സോസ്സിയേഷന്‍, വൈസ്‌മെന്‍ ക്ലബ്ബ് പാലാ, എസ്എംവൈഎം കിഴതടിയൂര്‍ യൂണിറ്റ് പാലാ എന്നീ സംഘടനകളുടെ സഹകരണത്തോടെയാണ് പരിപാടികള്‍ നടക്കുന്നത്.
0 Comments
ഇവിടെ കൊടുക്കുന്ന അഭിപ്രായങ്ങള്‍ പാലാ ടൈംസിന്റേതല്ല. സോഷ്യല്‍ മീഡിയകള്‍ വഴി കമന്റ് ചെയ്യുന്നവര്‍ അശ്ലീലമോ അസഭ്യമോ തെറ്റിദ്ധാരണാജനകമോ അപകീര്‍ത്തിപരമോ നിയമവിരുദ്ധമോ ആയ അഭിപ്രായങ്ങള്‍ പോസ്റ്റ് ചെയ്യുന്നത് സൈബര്‍ നിയമപ്രകാരം കുറ്റകരവും ശിക്ഷാര്‍ഹവുമാണ്.