മുന്‍ പഞ്ചായത്ത് പ്രസിഡണ്ടും കോണ്‍ഗ്രസ് അംഗവുമായ ജി സ്‌മോള്‍ തോമസ് വിട്ടുനിന്നു
പാലാ: മുത്തോലി ഗ്രാമപഞ്ചായത്ത് പ്രസിഡന്റായി കേരളാ കോണ്‍.(എം) ജോസ് വിഭാഗം സ്ഥാനാര്‍ത്ഥി സന്ധ്യാ ജി നായര്‍ തെരഞ്ഞെടുക്കപ്പെട്ടു. എതിര്‍ സ്ഥാനാര്‍ത്ഥി ബിജെ.പിയുടെ എന്‍. മായാദേവിയെ പരാജയപ്പെടുത്തിയാണ് മൂന്നിനെതിരെ എട്ട് വോട്ടുകള്‍ക്ക് സന്ധ്യ തെരഞ്ഞെടുക്കപ്പെട്ടത്. വെള്ളിയേപ്പള്ളി ഏഴാം വാര്‍ഡ് മെമ്പറാണ് സന്ധ്യ. 13 അംഗ പഞ്ചായത്ത് കമ്മിറ്റിയില്‍ 7 അംഗങ്ങള്‍ ഉള്ള കേരളാ കോണ്‍ഗ്രസ് എമ്മിന് നിലവില്‍ ഒറ്റയ്ക്ക് ഭൂരിപക്ഷമുണ്ട്.
രണ്ട് അംഗങ്ങള്‍ ഉള്ള കോണ്‍ഗ്രസ്സിലെ ഒരംഗം വോട്ടെടുപ്പില്‍ നിന്ന് വിട്ടു നിന്നത് ശ്രദ്ധേയമായി. സ്ഥാനമൊഴിഞ്ഞ പഞ്ചായത്ത് പ്രസിഡന്റ് ജിസ്മോള് തോമസാണ് പാര്‍ട്ടി വിപ്പ് ഉണ്ടായിരുന്നിട്ടും വോട്ടെടുപ്പില്‍ പങ്കെടുക്കാതിരുന്നത്. കോണ്‍ഗ്രസിലെ മറ്റൊരംഗം കേരളാ കോണ്‍ഗ്രസ് സ്ഥാനാര്‍ത്ഥിക്ക് വോട്ട് ചെയ്തു. ഒരംഗമുള്ള എല്‍.ഡി.എഫും വോട്ടെടുപ്പില്‍ പങ്കെടുത്തില്ല. പി.ഡബ്ല്യു.ഡി. കെട്ടിടവിഭാഗം അസി.എക്‌സിക്യൂട്ടീവ് എന്‍ജിനീയര്‍ വരണാധികാരിയായി.
യു.ഡി.എഫ് ധാരണ പ്രകാരം ഏതെങ്കിലും തദ്ദേശ സ്വയംഭരണ സ്ഥാപനത്തില്‍ ഒറ്റയ്ക്ക് ഭൂരിപക്ഷം ഉള്ള കക്ഷിയ്ക്കാണ് പ്രസിഡന്റ്, വൈസ് പ്രസിഡന്റ് സ്ഥാനങ്ങള്‍. എന്നാല്‍ കഴിഞ്ഞ നിയമസഭാ ഉപതെരഞ്ഞെടുപ്പു സമയത്ത് കോണ്‍ഗ്രസിന്റെ സമ്മര്‍ദ്ദത്തിനു വഴങ്ങി പ്രസിഡന്റ് പദവി കേരളാ കോണ്‍ഗ്രസ് (എം) കോണ്‍ഗ്രസിന് വിട്ടുനല്‍കുകയായിരുന്നു. സന്ധ്യാ ജി. നായര്‍ക്ക് കോണ്‍ഗ്രസ് അംഗം ജിസ്മോള് തോമസ് ഈ ധാരണ പ്രകാരം പ്രസിഡന്റാവുകയായിരുന്നു. ധാരണാ കാലവധി കഴിഞ്ഞതോടെ കോണ്‍ഗ്രസ് പ്രസിഡന്റ് രാജിവെച്ച ഒഴിവിലാണ് തെരഞ്ഞെടുപ്പ് നടന്നത്. കേരളാ കോണ്‍(എം)ലെ രാജന്‍ മുണ്ടമറ്റമാണ് മുത്തോലിയില്‍ വൈസ് പ്രസിഡന്റ്.
0 Comments
ഇവിടെ കൊടുക്കുന്ന അഭിപ്രായങ്ങള്‍ പാലാ ടൈംസിന്റേതല്ല. സോഷ്യല്‍ മീഡിയകള്‍ വഴി കമന്റ് ചെയ്യുന്നവര്‍ അശ്ലീലമോ അസഭ്യമോ തെറ്റിദ്ധാരണാജനകമോ അപകീര്‍ത്തിപരമോ നിയമവിരുദ്ധമോ ആയ അഭിപ്രായങ്ങള്‍ പോസ്റ്റ് ചെയ്യുന്നത് സൈബര്‍ നിയമപ്രകാരം കുറ്റകരവും ശിക്ഷാര്‍ഹവുമാണ്.