പാലാ: പാലായിൽ പോലീസിന് ജനകീയ മുഖം നൽകിയവരിലൊരാളായ എസ് ഐ ഷാജി സെബാസ്റ്റ്യൻ പുതിയ ദൗത്യവുമായി പീരുമേടിന്. ഇന്നലെ പാലായിൽ നിന്നും ചുമതല ഒഴിഞ്ഞ ഷാജി സെബാസ്റ്റ്യൻ ഇന്ന് പീരുമേട്ടിൽ ചുമതലയേൽക്കും.
കടപ്ലാമറ്റം സ്വദേശിയായ ഷാജി സെബാസ്റ്റ്യന്റെ പ്രവർത്തനങ്ങൾ പോലീസ് സ്റ്റേഷനുകളെക്കുറിച്ചു പൊതുജനങ്ങൾക്കുള്ള ധാരണ തിരുത്തിക്കുറിക്കാൻ ഇടയാക്കി. സ്റ്റേഷനിലെത്തുന്നവർക്കു ഹൃദ്യമായ അനുഭവം ഇദ്ദേഹം പി ആർ ഒ ആയിരുന്ന കാലത്ത് ആളുകൾക്കു ലഭിച്ചിരുന്നുവെന്ന് പാലാക്കാർ സാക്ഷ്യപ്പെടുത്തുന്നു. ജനമൈത്രി പോലീസുമായി ബന്ധപ്പെട്ട പ്രവർത്തനത്തിലൂടെ ജനങ്ങളും പോലീസുമായുള്ള ബന്ധം ദൃഢമാക്കി. സൗഹൃദപരമായ ഇടപെടലുകളിലൂടെ പോലീസിന്റെ ജനകീയ മുഖം ജനത്തിന് കാണിച്ചു കൊടുക്കാൻ ഷാജി സെബാസ്റ്റ്യനു സാധിച്ചു.
പ്രളയകാലത്ത് തനി പാലാക്കാരനായി രക്ഷാപ്രവർത്തനങ്ങൾക്കു നേതൃത്വം നൽകി. പലയിടങ്ങളിലും ഭക്ഷണവുമായി വെള്ളത്തിലൂടെ നീന്തി ചെന്നു. പ്രളയത്തിൽ കുടുങ്ങിയവരെ പുറത്തെത്തിക്കാനും നേതൃത്വം നൽകി.
പ്രളയദിനത്തിൽ ടൗണിൽ ഓളം വച്ച യുവാക്കളെ പ്രിൻസിപ്പൽഎസ് ഐ പിടികൂടിയപ്പോൾ യുവാക്കളുടെ ആഘോഷമാണെന്നു പറഞ്ഞ് അവർക്കൊപ്പം നിലകൊള്ളുകയും തുടർന്ന് അവരെ നിയമം പാലിക്കാൻ ഉപദേശിക്കുകയും ചെയ്തു. തുടർന്ന് രക്ഷാപ്രവർത്തനങ്ങൾക്കായി ഈ യുവാക്കളെ ഒപ്പം കൂട്ടാനും ഇദ്ദേഹത്തിനു കഴിഞ്ഞു.
ആളുകളോട് നല്ല സൗഹൃദബന്ധമുണ്ടെങ്കിലും നിയമകാര്യങ്ങളിൽ ഷാജി സെബാസ്റ്റ്യൻ വിട്ടുവീഴ്ചകൾക്കു തയ്യാറല്ല.
ഷാജി സെബാസ്റ്റ്യൻ പാലായിൽനിന്നും മാറുമ്പോൾ കുടുംബാംഗമായ ഒരാൾ മറ്റൊരു സ്ഥലത്തേയ്ക്ക് ജോലിക്കു പോകുന്ന വിധമുള്ള അവസ്ഥയിലാണ് പാലായിലെ രാഷ്ട്രീയ-സാമൂഹ്യ പ്രവർത്തകരും നാട്ടുകാരും. ഷാജി സെബാസ്റ്റ്യൻ ഒരു പോലീസുകാരൻ മാത്രമല്ല പാലാക്കാർക്ക്. വീട്ടുകാരൻ അല്ലെങ്കിൽ അയൽപക്കക്കാരൻ കൂടിയാണ്. എപ്പോഴും പാലാക്കാർക്കൊപ്പം നിലകൊള്ളാനും സത്യസന്ധമായി പെരുമാറാനും കഴിഞ്ഞതുമാണ് ഷാജി സെബാസ്റ്റ്യനെ ജനപ്രിയനാക്കിയത്.
ജനകീയനായ മികച്ച പോലീസ് ഉദ്യോഗസ്ഥനാണ് ഷാജി സെബാസ്റ്റ്യനെന്നു മാണി സി കാപ്പൻ എം എൽ എ പറഞ്ഞു. പാലാ പോലീസിനു ജനകീയ മുഖം നൽകിയ ഉദ്യോഗസ്ഥനാണ് ഷാജി സെബാസ്റ്റ്യൻ എന്നു മുനിസിപ്പൽ കൗൺസിലർ ടോണി തോട്ടം ചൂണ്ടിക്കാട്ടി. പോലീസ് സ്‌റ്റേഷനെക്കുറിച്ചുളള ധാരണ തിരുത്തിയത് ഇദ്ദേഹമാണെന്നു പ്രശസ്ത സാഹിത്യകാരി സിജിത അനിൽ പറയുന്നു.
പത്രപ്രവർത്തകനായ സുനിൽ പാലാ, വ്യാപാരിയായ അനൂപ് ചെറിയാൻ തുടങ്ങിയവരുടെ അഭിപ്രായവും മറിച്ചല്ല.
തിരിച്ചു പാലായ്ക്കു വരണമെന്ന ആശംസയുമായിട്ടാണ് പാലാക്കാർ ഷാജി സെബാസ്റ്റ്യനെ പീരിമേടിന് യാത്രയാക്കുന്നത്.
0 Comments
ഇവിടെ കൊടുക്കുന്ന അഭിപ്രായങ്ങള്‍ പാലാ ടൈംസിന്റേതല്ല. സോഷ്യല്‍ മീഡിയകള്‍ വഴി കമന്റ് ചെയ്യുന്നവര്‍ അശ്ലീലമോ അസഭ്യമോ തെറ്റിദ്ധാരണാജനകമോ അപകീര്‍ത്തിപരമോ നിയമവിരുദ്ധമോ ആയ അഭിപ്രായങ്ങള്‍ പോസ്റ്റ് ചെയ്യുന്നത് സൈബര്‍ നിയമപ്രകാരം കുറ്റകരവും ശിക്ഷാര്‍ഹവുമാണ്.