പാലാ: സപ്തതിയുടെ പടി ചവിട്ടാനൊരുങ്ങുന്ന ഏഴാച്ചേരി നാഷണൽ ലൈബ്രറിയിലെ ആദ്യ പുസ്തകം പുന:സമർപ്പണം ചെയ്ത് മാണി സി കാപ്പൻ എം എൽ എ
70 വർഷം മുമ്പ് ലൈബ്രറിക്ക് ആദ്യമായൊരു പുസ്തകം സംഭാവന ചെയ്തത് ഏഴാച്ചേരി ജി വി യു പി സ്കൂൾ അധ്യാപികയായിരുന്ന വാഴചാരിക്കൽ പൊന്നമ്മ ടീച്ചറായിരുന്നു. അന്ന് അധ്യാപക പരിശീലന വിദ്യാർത്ഥിനിയായിരുന്ന പുലിതൂക്കൽ പൊന്നമ്മ " ഗാന്ധിജിയുടെ ജീവചരിത്രം" എന്ന പുസ്തകമാണ് ലൈബ്രറിയ്ക്ക് നൽകിയത്. പൊന്നമ്മ ടീച്ചറിൻ്റെ ഈ അക്ഷര സമർപ്പണം പിന്നീട് പൊലിച്ചു. ഇന്ന് പതിനയ്യായിരത്തിൽപ്പരം പുസ്തകങ്ങളുള്ള "എ ഗ്രേഡ്'' ലൈബ്രറിയാണിത്.
നാഷണൽ ലൈബ്രറിയുടെ സപ്തതി ആഘോഷ പരിപാടികളെക്കുറിച്ച് ആലോചിക്കാനിരിക്കെയാണ് ഇന്നലെ രാവിലെ മാണി സി കാപ്പൻ എം എൽ എ ലൈബ്രറി സന്ദർശിക്കാനെത്തിയത്. അന്ന് പൊന്നമ്മ ടീച്ചർ സംഭാവന ചെയ്ത ആദ്യ പുസ്തകം യാതൊരു കോട്ടവും തട്ടാതെ സംരക്ഷിച്ചിരിക്കുന്നതു കണ്ടപ്പോൾ എം എൽ എയ്ക്ക് അത്ഭുതം. സപ്തതി പരിപാടികൾക്കു മുന്നോടിയായി താനീ പുസ്തകം പുന:സമർപ്പിക്കുകയാണെന്ന് എം എൽ എ പറഞ്ഞു. നാഷണൽ ലൈബ്രറി സെക്രട്ടറി സനൽകുമാർ ചീങ്കല്ലേൽ പുസ്തകം ഏറ്റുവാങ്ങി. താലൂക്ക് ലൈബ്രറി കൗൺസിൽ സെക്രട്ടറി റോയ് ഫ്രാൻസീസ്, നാഷണൽ ലൈബ്രറി പ്രസിഡൻ്റ് അഡ്വ. ഏഴാച്ചേരി വി.ജി.വേണുഗോപാൽ, ലൈബ്രറേറിയൻ രാമചന്ദ്രൻ തേരുന്താനം, വി ജി വിജയകുമാർ, എം സുശീൽ തുടങ്ങിയവർ പങ്കെടുത്തു.
ലൈബ്രറി മന്ദിരത്തിൻ്റെ ശോച്യാവസ്ഥ പരിഹരിക്കാൻ 5 ലക്ഷം രൂപാ എം എൽ എ ഫണ്ടിൽ നിന്നും അനുവദിച്ചതായി അറിയിച്ച മാണി സി കാപ്പൻ ഒരു ലാപ്ടോപ്പും നൽകാമെന്ന് വാഗ്ദാനം ചെയ്തു.
0 Comments
ഇവിടെ കൊടുക്കുന്ന അഭിപ്രായങ്ങള്‍ പാലാ ടൈംസിന്റേതല്ല. സോഷ്യല്‍ മീഡിയകള്‍ വഴി കമന്റ് ചെയ്യുന്നവര്‍ അശ്ലീലമോ അസഭ്യമോ തെറ്റിദ്ധാരണാജനകമോ അപകീര്‍ത്തിപരമോ നിയമവിരുദ്ധമോ ആയ അഭിപ്രായങ്ങള്‍ പോസ്റ്റ് ചെയ്യുന്നത് സൈബര്‍ നിയമപ്രകാരം കുറ്റകരവും ശിക്ഷാര്‍ഹവുമാണ്.