ചേര്‍പ്പുങ്കല്‍ : ബി.വി.എം. കോളേജില്‍ പരീക്ഷക്കെത്തിയ വിദ്യാര്‍ത്ഥിനിയുടെ ഹാള്‍ടിക്കറ്റ് ദുരുപയോഗത്തെ തുടര്‍ന്നുണ്ടായ നടപടിയില്‍ അന്വേഷണം നടത്തിയ സര്‍വ്വകലാശാലയ്ക്ക് വീഴ്ചയുണ്ടായാല്‍ അത് പോലീസ് കേസിന്റെ തുടരന്വേഷണത്തെ ഗൗരവമായി ബാധിക്കുമെന്ന് കെ.സി.ബി.സി. ടെമ്പറന്‍സ് മൂവ്‌മെന്റ് സംസ്ഥാന സെക്രട്ടറി പ്രസാദ് കുരുവിള.
പരീക്ഷാഹാളിലെ ദൃശ്യങ്ങളും വിദ്യര്‍ത്ഥിനിയുടെ ഹാള്‍ടിക്കറ്റും സര്‍വ്വകലാശാലയുടെ അനുമതി കൂടാതെ പുറത്തുവിട്ടത് വീഴ്ചയാണെന്ന് കണ്ടെത്തിയ സര്‍വ്വകലാശാല തന്നെ പോലീസിന്റെ കേസന്വേഷണം തുടരവേ പ്രാഥമിക അന്വേഷണ റിപ്പോര്‍ട്ട് പുറത്തുവിട്ടത് ഗുരുതര ചട്ടലംഘനമാണോയെന്ന് നിയമവിദഗ്ധര്‍ പരിശോധിക്കണം.
വിദ്യാര്‍ത്ഥിനി അരമണിക്കൂറോളം പരീക്ഷാഹാളില്‍ ഇരുന്നു എന്നതാണ് ഗുരുതരമായ ലംഘനമായി സര്‍വ്വകലാശാല കാണുന്നത്. ഹാള്‍ടിക്കറ്റില്‍ പെന്‍സില്‍ കൊണ്ട് കോപ്പി എഴുതിയിരുന്നു എന്നതിനാല്‍ തന്നെ മുന്‍ പരീക്ഷകളുടെയും സി.സി.ടി.വി. ദൃശ്യങ്ങള്‍ പരിശോധിക്കണമായിരുന്നു. യോഗ്യതയില്ലാത്തവര്‍ പരീക്ഷയെഴുതി റാങ്ക് വാങ്ങിയ നാടാണ് കേരളം. പുനപരീക്ഷയില്‍ നാലോ അഞ്ചോ മാര്‍ക്ക് വാങ്ങിയതും ഓര്‍മ്മയുണ്ടാകണം
കോളേജ് മുതല്‍ ഹൈവേ വരെയുള്ള ഒരു കിലോമീറ്റര്‍ യാത്രക്കിടയില്‍ കുട്ടിക്ക് ഫോണ്‍കോള്‍ വന്നിട്ടുണ്ടെങ്കില്‍ അതും പോലീസ് കേസന്വേഷണത്തിന്റെ ഭാഗമാക്കണം. ഹൈവേയിലെ ബസ് സ്റ്റോപ്പിലെത്തിയ കുട്ടി വീണ്ടും തിരിച്ചുപോയി പാലത്തില്‍ നിന്നും ചാടിയതില്‍ ദുരൂഹതയുണ്ടോയെന്ന് പോലീസ് പരിശോധിക്കണം. ഹാള്‍ടിക്കറ്റിലെ കൈയ്യക്ഷരം ഉറപ്പുവരുത്താന്‍ സുഹൃത്തുക്കളുടെ കൈയ്യക്ഷരവും പരിശോധിക്കണം.
പരീക്ഷാഹാളില്‍ ആത്മാര്‍ത്ഥമായി പണിയെടുക്കുന്ന അധ്യാപകരുടെ മനസ്സുമടുപ്പിക്കുന്ന നിലപാടുകള്‍ ആരുടെയും ഭാഗത്തുനിന്നുണ്ടാവരുത്. അത് പരീക്ഷയുടെ സുതാര്യതയെ കാര്യമായി ബാധിക്കും.
പരീക്ഷാഹാളില്‍ പിടിക്കപ്പെടുന്ന കുട്ടികള്‍ക്ക് കൗണ്‍സിലിംഗ് ഏര്‍പ്പെടുത്തണമെന്ന സര്‍വ്വകലാശാലയുടെ അറിയിപ്പ് സ്വാഗതം ചെയ്യുന്നു. ഇക്കാര്യം കഴിഞ്ഞ ദിവസം ആവശ്യപ്പെട്ടിരുന്നതാണ്.
സ്ഥാപനങ്ങളില്‍ അനിഷ്ടസംഭവങ്ങള്‍ ഉണ്ടായാല്‍പിന്നെ സ്ഥാപനത്തിന്റെ മതംനോക്കിയുള്ള പ്രതികരണങ്ങളും പ്രതിഷേധങ്ങളും വര്‍ദ്ധിച്ചുവരികയാണ്. ഇതിനെതിരെ പൊതുസമൂഹം ജാഗരൂകരാകണം.
0 Comments
ഇവിടെ കൊടുക്കുന്ന അഭിപ്രായങ്ങള്‍ പാലാ ടൈംസിന്റേതല്ല. സോഷ്യല്‍ മീഡിയകള്‍ വഴി കമന്റ് ചെയ്യുന്നവര്‍ അശ്ലീലമോ അസഭ്യമോ തെറ്റിദ്ധാരണാജനകമോ അപകീര്‍ത്തിപരമോ നിയമവിരുദ്ധമോ ആയ അഭിപ്രായങ്ങള്‍ പോസ്റ്റ് ചെയ്യുന്നത് സൈബര്‍ നിയമപ്രകാരം കുറ്റകരവും ശിക്ഷാര്‍ഹവുമാണ്.