പാലാ: പാലാ സെൻ്റ് തോമസ് കോളജിലെ പ്രഭാഷണ പരിപാടിയിൽ തനിക്കുണ്ടായിരുന്ന ക്ഷണം പിൻവലിച്ചുവെന്ന് ദി കാരവൻ മുൻ എഡിറ്റർ വിനോദ് കെ ജോസ് ഫേസ് ബുക്കിൽ കുറിച്ചു. 'ഇന്ത്യൻ ജനാധിപത്യത്തിൻ്റെ അവസ്ഥ' എന്ന വിഷയത്തെക്കുറിച്ച് സംസാരിക്കാനായിരുന്നു ക്ഷണം. ഫെബ്രുവരി 5 ന് നടക്കേണ്ടിയിരുന്ന പരിപാടിയുടെ പോസ്റ്ററും പുറത്തിറക്കിയിരുന്നു. താൻ ഒരു വിവാദ വ്യക്തിത്വമാണെന്നും മാനേജ്മെൻറും പ്രിൻസിപ്പലും തൻ്റെ സാന്നിദ്ധ്യം താത്പര്യപ്പെടുന്നില്ലെന്ന് അറിയിപ്പ് ലഭിച്ചതായും വിനോദ് കെ ജോസ് കുറിച്ചു.
താൻ ഒരു വാക്കു പോലും പറയാതെ പ്രഭാഷണം നടന്നതായും ഇന്ത്യൻ ജനാധിപത്യത്തിൻ്റെ അവസ്ഥ വിശദീകരിക്കപ്പെട്ടുവെന്നും വിനോദ് ജോസ് പറഞ്ഞു.
വിനോദ് കെ ജോസിൻ്റെ ഫേസ്ബുക്ക് പോസ്റ്റിൻ്റെ മലയാള പരിഭാഷ ചുവടെ.
ഇന്ന് എനിക്ക് ആദ്യമായി ഒരു ‘അനുകൂലമല്ലാത്ത ഒഴിവാക്കൽ’ (disinvitation) നേരിടേണ്ടി വന്നു. നാം ജീവിക്കുന്ന ഈ കാലഘട്ടത്തിൽ പലരും ഇത്തരം അനുഭവങ്ങളിലൂടെ കടന്നുപോകാറുണ്ടെന്ന് എനിക്കറിയാം. എങ്കിലും ആദ്യത്തെ അനുഭവം എപ്പോഴും മധുരതരമാണ്; പ്രത്യേകിച്ചും നിങ്ങളുടെ സാന്നിധ്യം പോലും ചിലരെ അസ്വസ്ഥരാക്കുന്നു എന്ന് തിരിച്ചറിയുമ്പോൾ.
കേരളത്തിലെ ഏറ്റവും പഴക്കമേറിയ കലാലയങ്ങളിൽ ഒന്നായ പാലാ സെന്റ് തോമസ് കോളേജിലെ ടി.സി. തോമസ് എൻഡോവ്മെന്റ് പ്രഭാഷണത്തിനായി എന്നെ ക്ഷണിച്ചിരുന്നു. "ഇന്ത്യൻ ജനാധിപത്യത്തിന്റെ അവസ്ഥ" എന്നതായിരുന്നു പ്രഭാഷണ വിഷയം. രസകരമായ കാര്യം, ഈ ഒഴിവാക്കലിലൂടെയും പാലായിലേക്ക് യാത്ര ചെയ്യേണ്ടി വന്നില്ല എന്ന ആശ്വാസത്തിലൂടെയും, ഒരു വാക്കുപോലും ഉരിയാടാതെ തന്നെ ആ പ്രഭാഷണം പൂർത്തിയായിരിക്കുന്നു എന്നതാണ്. ഇന്ത്യൻ ജനാധിപത്യത്തിന്റെ ഇന്നത്തെ അവസ്ഥ ഇതിലൂടെ തന്നെ വ്യക്തമായിക്കഴിഞ്ഞു.
ഞാൻ ഒരു "വിവാദ വ്യക്തിത്വം" (controversial figure) ആയതിനാൽ മാനേജ്മെന്റും പ്രിൻസിപ്പലും എന്നെ ക്യാമ്പസിൽ പ്രവേശിപ്പിക്കാൻ ആഗ്രഹിക്കുന്നില്ല എന്ന സന്ദേശമാണ് ഇന്ന് രാവിലെ എനിക്ക് ലഭിച്ചത്.
പാലാ സെന്റ് തോമസ് കോളേജ് കത്തോലിക്കാ രൂപതയുടെ കീഴിലുള്ളതാണ്. നാം വിചിത്രമായൊരു കാലത്താണ് ജീവിക്കുന്നത്. കേരളത്തിലെ ക്രൈസ്തവ സമൂഹത്തിലെ ഒരു വിഭാഗമെങ്കിലും, പ്രസക്തവും സുതാര്യവുമായ സംഭാഷണങ്ങളെ തടഞ്ഞുകൊണ്ട് ആർ.എസ്.എസ്-ബി.ജെ.പി നിലപാടുകൾക്കൊപ്പമാണ് ഇന്ന് നിൽക്കുന്നത്. ചുരുങ്ങിയ പക്ഷം, കേരളത്തിൽ ഹൈന്ദവ വലതുപക്ഷത്തിന് ചുവടുറപ്പിക്കാൻ അവർ സഹായം ചെയ്തു കൊടുക്കുകയാണ്.
തങ്ങളുടെ വിദ്യാർത്ഥികളുടെ നിലവാരം താഴുകയാണെന്നത് ക്രൈസ്തവ വിദ്യാഭ്യാസ സ്ഥാപനങ്ങളുടെ മാനേജ്മെന്റുകൾ ഇന്ന് പതിവായി പറയുന്ന പരാതിയാണ്. എന്നാൽ ഈ കോളേജുകൾ വിദ്യാർത്ഥികൾക്ക് നൽകുന്ന ഗുണനിലവാരം എന്താണ് എന്ന ചോദ്യം കൂടി ഇവിടെ ഉയരുന്നു. സോഷ്യൽ സയൻസ് വിദ്യാഭ്യാസത്തിന്റെ അവിഭാജ്യ ഘടകമായ ആശയങ്ങളും അനുഭവങ്ങളും വിദ്യാർത്ഥികളിൽ നിന്ന് സെൻസർ ചെയ്ത് മാറ്റാൻ മാനേജ്മെന്റ് തീരുമാനിക്കുമ്പോൾ, പിന്നെന്തിന് നിലവാരത്തെക്കുറിച്ച് പരാതിപ്പെടണം? ആശയങ്ങൾക്കായി സ്വയം ബലിയർപ്പിച്ച വിശുദ്ധ തോമസിന്റെ പേരിൽ, നമ്മൾ വെറും മുട്ടകളാണോ വിരിയിച്ചെടുക്കുന്നത്?
0 Comments
ഇവിടെ കൊടുക്കുന്ന അഭിപ്രായങ്ങള് പാലാ ടൈംസിന്റേതല്ല. സോഷ്യല് മീഡിയകള് വഴി കമന്റ് ചെയ്യുന്നവര് അശ്ലീലമോ അസഭ്യമോ തെറ്റിദ്ധാരണാജനകമോ അപകീര്ത്തിപരമോ നിയമവിരുദ്ധമോ ആയ അഭിപ്രായങ്ങള് പോസ്റ്റ് ചെയ്യുന്നത് സൈബര് നിയമപ്രകാരം കുറ്റകരവും ശിക്ഷാര്ഹവുമാണ്.