പാലാ: സർക്കാർ വക കക്കൂസിലെ മാലിന്യം ഒഴുക്കുന്നതു തടയാനാകില്ലെന്ന തിരിച്ചറിവിന് പ്രായം പത്തു വയസ്. പാലാ ജനറൽ ആശുപത്രിയിലെ കക്കൂസ് മാലിന്യമാണ് തടസ്സമേതും കൂടാതെ പത്തു വർഷമായി ഒഴുക്കിവിടുന്നത്.
കക്കൂസ് മാലിന്യമുൾപ്പെടെയുള്ളവ എങ്ങനെ കൈകാര്യം ചെയ്യണമെന്ന് ആരോഗ്യ പ്രവർത്തകരും തദ്ദേശ സ്വയംഭരണ സ്ഥാപനങ്ങളും വാതോരാതെ ക്ലാസെടുക്കുന്ന നാട്ടിലാണ് പത്തു വർഷമായി കക്കൂസ് മാലിന്യം ഒഴുക്കുന്നതിനെതിരെയുള്ള പരാതി നിലനിൽക്കുന്നത്.
ജനറൽ ആശുപത്രിയോടു ചേർന്നു പ്രവർത്തിക്കുന്ന എവർഗ്രീൻ കോംപ്ലെക്സിലെ ജീവനക്കാരും സ്ഥാപന ഉടമകളുമാണ് കക്കൂസ് മാലിന്യത്തിനു നടുവിൽ പത്തു വർഷമായി കഴിയുന്നത്.
2010 ഒക്ടോബർ 14 - ന് പാലാ ആർ ഡി ഓയ്ക്ക് എവർഗ്രീൻ കോംപ്ലെക്സിലെ സ്ഥാപനങ്ങളിലുള്ള ജീവനക്കാർ കൊടുത്ത പരാതിയിൽ ഇപ്രകാരം പറയുന്നു.
ഏതാണ്ട് ഒരു മാസം മുമ്പ് പാലാ ജനറൽ ആശുപത്രിയുടെ മെയിൻ റോഡ് സൈഡിലുള്ള കക്കൂസ് ടാങ്ക് പൊട്ടുകയും മാലിന്യം റോഡിലേയ്ക്ക് ഒഴുകുകയും ചെയ്തിരുന്നു. പിന്നീട് നാലഞ്ചു ദിവസം കഴിഞ്ഞപ്പോൾ കക്കൂസ് ടാങ്കിലെ മാലിന്യം മുഴുവൻ എവർഗ്രീൻ കോംപ്ലക്സിൻ്റെ സമീപത്തുകൂടി ഒഴുകുകയും ദുർ:ഗന്ധം വമിക്കുകയും ചെയ്യുന്നുവെന്നായിരുന്ന പരാതിയിൽ പറഞ്ഞിരുന്നത്.
ആളുകൾക്ക് ആരോഗ്യ പ്രശ്നങ്ങൾ ഉണ്ടാകുന്നതായും ചൂണ്ടിക്കാട്ടിയിരുന്നു. മാലിന്യം കുടിച്ചു നാലു പൂച്ചക്കുഞ്ഞുങ്ങൾ മരിച്ചതായും പരാതിയിൽ ഉണ്ട്. 52 പേർ ഒപ്പിട്ട പരാതിയുടെ പകർപ്പ് മുഖ്യമന്ത്രി മുതൽ മുനിസിപ്പൽ സെക്രട്ടറി, ജില്ലാ മെഡിക്കൽ ഓഫീസർ അടക്കം ഒൻപതു പേർക്കു കൊടുത്തതായും പരാതിക്കാർ പറയുന്നു.
എന്നാൽ പരാതി പറഞ്ഞിട്ടു പത്തുവർഷം കഴിഞ്ഞിട്ടും നടപടിയുണ്ടായിട്ടില്ലെന്ന് പരാതിക്കാരായ ടി സി എബ്രാഹം, വിജയപ്രസ്, ജിമ്മി ചെറിയാൻ, ഗ്ലോബൽ പെയിൻ്റ്സ്, ബോണി ജെ മറ്റം, മറ്റത്തിൽ ബ്രദേഴ്സ് തുടങ്ങിയവർ പറയുന്നു.
കൊറോണയുടെ പശ്ചാത്തലത്തിൽ ഇവർ ഭീതിയിലാണ്. കൊറോണ ക്വാറൈൻറയിൻ കേന്ദ്രം ജനറൽ ആശുപത്രിയിൽ സ്ഥാപിച്ചാൽ സ്ഥിതി വഷളാകുമെന്നും ഇവർ ഭയപ്പെടുന്നു. എലിപ്പനി, ഡെങ്കിപ്പനി മുതലായവയും പടരാൻ സാധ്യതയുണ്ടെന്നും ഇവർക്കു ഭീതിയുണ്ട്.
അടിയന്തിരമായി പ്രശ്ന പരിഹാരം കാണണമെന്ന് അവർ ആവശ്യപ്പെടുന്നു.
ഇതു സംബന്ധിച്ചു മാണി സി കാപ്പൻ എം എൽ എ യ്ക്കു നൽകി. പരാതിയെക്കുറിച്ചു അന്വേഷിച്ചു അടിയന്തിര നടപടി സ്വീകരിക്കാൻ മാണി സി കാപ്പൻ ജനറൽ ആശുപത്രി അധികൃതർക്കു നിർദ്ദേശം നൽകി.
എം എൽ എ യുടെ നിർദ്ദേശപ്രകാരം സെപ്റ്റിടാങ്കിനു അപാകതയുണ്ടോയെന്നു പരിശോധിക്കാൻ നഗരസഭാ എഞ്ചിനീയറിംഗ് വിഭാഗത്തിന് കത്തു നൽകിയതായി ആശുപത്രി സൂപ്രണ്ട് ഡോ അഞ്ജു സി മാത്യു പറഞ്ഞു. പരിശോധനയ്ക്കുശേഷം നടപടി സ്വീകരിക്കുമെന്നും ആശുപത്രി സൂപ്രണ്ട് അറിയിച്ചു.
10 വർഷം മുമ്പ് കൊടുത്ത പരാതിയുടെ പകർപ്പ്
0 Comments
ഇവിടെ കൊടുക്കുന്ന അഭിപ്രായങ്ങള്‍ പാലാ ടൈംസിന്റേതല്ല. സോഷ്യല്‍ മീഡിയകള്‍ വഴി കമന്റ് ചെയ്യുന്നവര്‍ അശ്ലീലമോ അസഭ്യമോ തെറ്റിദ്ധാരണാജനകമോ അപകീര്‍ത്തിപരമോ നിയമവിരുദ്ധമോ ആയ അഭിപ്രായങ്ങള്‍ പോസ്റ്റ് ചെയ്യുന്നത് സൈബര്‍ നിയമപ്രകാരം കുറ്റകരവും ശിക്ഷാര്‍ഹവുമാണ്.