നഗരസഭ മുന്‍കൈ എടുത്തു; ചെത്തിമറ്റത്തെ വെള്ളക്കെട്ടിന് ശാപമോക്ഷം

ചെത്തിമറ്റത്ത് വെള്ളക്കെട്ട് ഒഴിവാക്കുന്ന പണികള്‍ നടക്കുന്നു

പാലാ : ഏറ്റുമാനൂര്‍ - പൂഞ്ഞാര്‍ ഹൈവേയില്‍ പാലാ ചെത്തിമറ്റത്ത് ആര്‍ടി ഓഫിസിന് മുന്‍പില്‍ വര്‍ഷങ്ങളായി തുടരുന്ന വെള്ളക്കെട്ടിന് പരിഹാരമായി. റോഡിന്റെ ഇരുവശങ്ങളിലും കോണ്‍ക്രീറ്റ് ചെയ്ത് വെള്ളം ഒഴികിപ്പോകാന്‍ പാകത്തിന് ഒരുക്കിയിരുന്നെങ്കിലും കേബിള്‍ സ്ഥാപിക്കാന്‍ കുഴിയെടുത്തതിനെ തുടര്‍ന്ന് രണ്ട് വര്‍ഷത്തോളമായി ഓടകളും കോണ്‍ക്രീറ്റും തകര്‍ന്ന് വെള്ളക്കെട്ടും ചെളികൂനയും പതിവായിരുന്നു. കോണ്‍ക്രീറ്റ് ചെയ്ത ഭാഗത്ത് ഒഴുക്കില്ലാതെ കെട്ടി കിടക്കുന്ന വെള്ളത്തില്‍ ഇലകള്‍ ചീഞ്ഞളിഞ്ഞ് ദുര്‍ഗന്ധം വമിക്കുന്ന അവസ്ഥയും ഉണ്ടായിരുന്നു. ശക്തമായ മഴയില്‍ ഒന്നരയടിയോളം വെള്ളക്കെട്ട് ഉയര്‍ന്നിരുന്നു. ചെറുവാഹനങ്ങള്‍ക്ക് കടന്നുപോകാന്‍ കഴിയാത്തവിധത്തിലായിരുന്നു വെള്ളം. ആര്‍.ടി. ഓഫീസിലെത്തുന്നവര്‍ക്കും വ്യാപാരികള്‍ക്കും നാട്ടുകാര്‍ക്കും നാളുകളായി ബുദ്ധിമുട്ട് സൃഷ്ടിക്കുന്നുണ്ട്.

കൗണ്‍സിലര്‍ പ്രസാദ് പെരുമ്പള്ളിയുടെ നേതൃത്വത്തില്‍ നിരവധി തവണ പൊതുമരാമത്ത്, നഗരസഭ അധികൃതര്‍ക്ക് പരാതിയും നിവേദനങ്ങളും നല്‍കിയെങ്കിലും പരസ്പരം പഴിചാരല്‍ മാത്രമാണ് നടന്നത്. മുനിസിപ്പല്‍ അധികൃതരോട് പരാതിപ്പെടുമ്പോള്‍ പൊതുമരാമത്തിനാണ് ചുമതലയെന്ന് പറഞ്ഞ് കയ്യൊഴിയും. എന്നാല്‍ റോഡിന്റെ ചുമതല മാത്രമാണ് തങ്ങള്‍ക്കുള്ളതെന്നാണ് പൊതുമരാമത്തിന്റെ മറുപടി. ഓടകള്‍ വൃത്തിയാക്കേണ്ടത് നഗരസഭയുടെ ജോലിയാണെന്നുമായിരുന്നു ലഭിച്ചിരുന്ന അറിയിപ്പ്.  ആശയക്കുഴപ്പം എല്ലാത്തിനും തടസ്സമായിരുന്നു. ഒടുവില്‍ വാര്‍ഡ് കൗണ്‍സിലര്‍ പ്രസാദിന്റെ ശ്രമഫലമായി നഗരസഭ ഫണ്ടില്‍ പെടുത്തി ടെന്റര്‍ നടപടികള്‍ സ്വീകരിച്ച് പിഡബ്ല്യുഡി അനുമതിയോടെ പണി പൂര്‍ത്തീകരിക്കുകയായിരുന്നു.

പഴയ വെള്ളക്കെട്ട് ചിത്രം