കോട്ടയം: പരീക്ഷ എഴുതാൻ വന്ന വിദ്യാർത്ഥിനി ആത്മഹത്യ ചെയ്ത സംഭവത്തിൽ ചേർപ്പുങ്കൽ ബി വി എം കോളജിനെതിരെ സർവ്വകലാശാല അന്വേഷണസമിതി. ഹാൾ ടിക്കറ്റിനു പിന്നിൽ ഉത്തരം എഴുതിയത് കണ്ടെത്തിയ ശേഷം അഞ്ജു പി ഷാജിയെ ഒരു മണിക്കൂറോളം ഹാളിലിരുത്തിയത് വീഴ്ചയാണെന്നാണ് സമിതിയുടെ കണ്ടെത്തൽ.
പരീക്ഷയ്ക്കിടെ ഇത്തരം ക്രമക്കേടുകൾ കണ്ടെത്തിയാൽ വിദ്യാർത്ഥിയെ പിന്നെ ഹാളിൽ ഇരുത്താൻ പാടില്ലെന്നാണ് സർവ്വകലാശാല ചട്ടമെന്നും ഇതു കോളജ് ലംഘിച്ചുവെന്നും ക്ലാസിലിരുത്തിയത് അഞ്ജുവിനെ മാനസികമായി തളർത്തിയെന്നും അന്വേഷണ സമിതി വിലയിരുത്തുന്നു.
ഡോ എം എസ് മുരളി, അജി സി പണിക്കർ, പ്രൊഫ വി എസ് പ്രവീൺകുമാർ എന്നിവരാണ് അന്വേഷണസമിതിയംഗങ്ങൾ. ഇവർ ഇന്ന് ഇതു സംബന്ധിച്ചു വൈസ് ചാൻസിലർക്കു റിപ്പോർട്ടു നൽകും.
അഞ്ജുവിൻ്റെ കൈയ്യക്ഷരം പരിശോധിക്കുന്നതിൻ്റെ ഭാഗമായി പോലീസ് അഞ്ജുവിൻ്റെ നോട്ടുബുക്കുകൾ കാഞ്ഞിരപ്പള്ളിയിലെ വീട്ടിൽ നിന്നും ശേഖരിച്ചു. ഹാൾ ടിക്കറ്റും ബുക്കുകളും ഫോറിൻസിക് പരിശോധനയ്ക്കായി തിരുവനന്തപുരത്തെ ലാബിലേയ്ക്ക് അയയ്ക്കും.
എന്നാൽ ഹാൾ ടിക്കറ്റിൽ കോപ്പി അടിച്ചത് കണ്ടെത്തിയതിനെത്തുടർന്നാണ് നടപടി സ്വീകരിച്ചതെന്ന് കോളജ് അധികൃതർ പറഞ്ഞു. കുട്ടിയോട് ദേഷ്യപ്പെട്ടു സംസാരിച്ചിട്ടില്ല. എണ്ണീറ്റു നിർത്തിയതുപോലുമില്ല. പരീക്ഷാ ഡ്യൂട്ടിയിലുണ്ടായിരുന്ന അധ്യാപകനാണ് ക്രമക്കേട് കണ്ടെത്തിയത്. ഇത് പ്രിൻസിപ്പലിനോട് റിപ്പോർട്ടു ചെയ്തു. നടപടിയുടെ ഭാഗമായി പ്രിൻസിപ്പലിനു വിശദീകരണം നൽകണമെന്നാവശ്യപ്പെട്ടുവെങ്കിലും അതു നൽകാതെ കുട്ടിപോകുകയായിരുന്നുവെന്നും അധികൃതർ വ്യക്തമാക്കി.
0 Comments
ഇവിടെ കൊടുക്കുന്ന അഭിപ്രായങ്ങള്‍ പാലാ ടൈംസിന്റേതല്ല. സോഷ്യല്‍ മീഡിയകള്‍ വഴി കമന്റ് ചെയ്യുന്നവര്‍ അശ്ലീലമോ അസഭ്യമോ തെറ്റിദ്ധാരണാജനകമോ അപകീര്‍ത്തിപരമോ നിയമവിരുദ്ധമോ ആയ അഭിപ്രായങ്ങള്‍ പോസ്റ്റ് ചെയ്യുന്നത് സൈബര്‍ നിയമപ്രകാരം കുറ്റകരവും ശിക്ഷാര്‍ഹവുമാണ്.