ഓൺലൈൻ പഠനം: മാണി സി കാപ്പൻ്റെ കരുതലിൽ ലാപ്ടോപ്പുകൾ എത്തുന്നു

പാലാ: നിയോജകമണ്ഡലത്തിൽ ഓൺലൈൻ പഠനത്തിന് ബുദ്ധിമുട്ടുന്ന വിദ്യാർത്ഥികൾക്കുള്ള ലാപ്ടോപ്പുകൾ അടുത്തയാഴ്ച എത്തിച്ചേരുമെന്ന് മാണി സി കാപ്പൻ എം എൽ എ അറിയിച്ചു.

പഞ്ചായത്തുകൾ നൽകിയ ലിസ്റ്റുകൾ പ്രകാരമാണ് ലാപ്ടോപ്പുകൾ അനുവദിക്കുന്നത്. ധനമന്ത്രി ഡോ ടി എം തോമസ് ഐസക്കുമായി തിരുവനന്തപുരത്ത് നടത്തിയ കൂടിക്കാഴ്ചയിലാണ് ഇക്കാര്യത്തിൽ ധാരണയായത്. ലാപ്ടോപ്പുകൾ എത്തിക്കാനുള്ള നടപടികൾ അടിയന്തിരമായി പൂർത്തീകരിക്കാൻ മന്ത്രി നിർദേശം നൽകിയതായും എം എൽ എ പറഞ്ഞു.

കഴിഞ്ഞ ആഴ്ച മഴക്കെടുതി നേരിടാൻ സിവിൽ സ്റ്റേഷനിൽ ചേർന്ന യോഗത്തിനിടെ ഓൺലൈൻ പഠനത്തിന് ബുദ്ധിമുട്ടുന്ന വിദ്യാർത്ഥികളുടെ വിവരം എം എൽ എ ശ്രദ്ധയിൽ പ്പെടുത്തിയിരുന്നു. ഇതേത്തുടർന്ന് ഇതിനു വേണ്ടി വരുന്ന ലാപ്ടോപ്പുകളുടെ എണ്ണം നൽകാൻ പഞ്ചായത്ത് അധികൃതർക്ക് മാണി സി കാപ്പൻ എം എൽ എ നിർദ്ദേശം നൽകിയിരുന്നു. ഇങ്ങനെ ലഭിച്ച ലിസ്റ്റു പ്രകാരം പഞ്ചായത്തുകൾ വഴിയാണ് ലാപ്ടോപ്പുകൾ ലഭ്യമാക്കുന്നത്.