പാലാ: നഗരസഭയിലെ സാമ്പത്തിക പ്രതിസന്ധിക്കു പരിഹാരമായി. മാണി സി കാപ്പൻ എം എൽ എ കഴിഞ്ഞ ദിവസം തദ്ദേശ സ്വയംഭരണ വകുപ്പ് മന്ത്രി എ സി മൊയ്തീനുമായി നടത്തിയ ചർച്ചയെത്തുടർന്ന് ശുചിത്വമിഷൻ ഫണ്ടിൽ നിന്നും ചെലവൊഴിക്കാതെ കിടന്ന 1.97 കോടി രൂപ വ്യവസ്ഥകൾക്കു വിധേയമായി വിനിയോഗിക്കുന്നതിന് സർക്കാർ അനുമതി നൽകി.
ജീവനക്കാരുടെ മെയ്, ജൂൺ, ജൂലൈ മാസങ്ങളിലെ ശമ്പളവും പെൻഷനും അനുവദിക്കുന്നതിന് തുക വിനിയോഗിക്കാമെന്ന് ഇതുസംബന്ധിച്ചു പുറപ്പെടുവിച്ച ഉത്തരവിൽ പ്രിൻസിപ്പൽ സെക്രട്ടറി ബിശ്വനാഥ് സിൻഹ വ്യക്തമാക്കി.
ഇങ്ങനെ അനുവദിക്കുന്ന തുക 6 മാസത്തിനുള്ളിൽ തിരികെ നിക്ഷേപിക്കണമെന്ന വ്യവസ്ഥയിലാണ് സർക്കാർ ഉത്തരവ് പുറപ്പെടുവിച്ചിട്ടുള്ളത്.
നഗരസഭയിലെ സാമ്പത്തിക പ്രതിസന്ധിക്കു പരിഹാരം കാണാൻ നടപടി സ്വീകരിക്കണമെന്നാവശ്യപ്പെട്ടു കൊണ്ട് ജീവനക്കാരും കൗൺസിലർമാരും മാണി സി കാപ്പൻ എം എൽ എ യ്ക്കു നിവേദനം നൽകിയിരുന്നു. ഇതേത്തുടർന്നാണ് എം എൽ എ തിരുവന്തപുരത്തെത്തി മന്ത്രിയുമായി ചർച്ച ചെയ്തത്.
0 Comments
ഇവിടെ കൊടുക്കുന്ന അഭിപ്രായങ്ങള്‍ പാലാ ടൈംസിന്റേതല്ല. സോഷ്യല്‍ മീഡിയകള്‍ വഴി കമന്റ് ചെയ്യുന്നവര്‍ അശ്ലീലമോ അസഭ്യമോ തെറ്റിദ്ധാരണാജനകമോ അപകീര്‍ത്തിപരമോ നിയമവിരുദ്ധമോ ആയ അഭിപ്രായങ്ങള്‍ പോസ്റ്റ് ചെയ്യുന്നത് സൈബര്‍ നിയമപ്രകാരം കുറ്റകരവും ശിക്ഷാര്‍ഹവുമാണ്.